Løgmaður kann einki siga um nevndarval í BankNordik

Løgmaður kann ikki svara, hvør hansara lutur er í avgerðini um at koyra alla nevndina í BankNordik frá og velja nýggja nevnd.

Í svari til Høgna Hoydal, løgtingsmann, sigur hann, at BankNordik er børskrásettur. 

Hann kann tí ikki endurgeva samrøður, sum hann hevur havt við stóru partaeigarar bankans. 

Nevndarforkvinna bankans kunnaði løgmann um innkallingina til aðalfundin í ár.

Høvdu uppskot um nevnd

Stóru partaeigarar bankans høvdu fund um uppskot um nevnd.

Stóru partaeigararnir eru partafelagið Tjaldur og smápartafelagið Framherji, sum eiga fimm prosent hvørt, Lind Invest, sum eigur 12 prosent, Protector Forsikring ASA, sum eigur 11 prosent og landsstýrið, sum eigur 35 prosent. Hetta geva 68 prosent.

Áðrenn freistin fór at kalla inn til aðalfundin, sendu umboð fyri stóru partaeigararnar uppskot um nevndarval.

Eiga bara 10 prosent av atkvøðunum

Hóast landsstýrið eigur 35 prosent, hevur tað bara 10 prosent av atkvøðunum á aðalfundi.

Í BankNordik eru 6.000 føroyskir partaeigarar, sum saman við landsstýrinum eiga 59 prosent av bankanum.

Danskir partaeigarar eiga 21 prosent, norskir 11 prosent og íslendskir eitt prosent, sigur Bárður á Steig Nielsen, løgmaður, í svarinum til Høgna Hoydal, løgtingsmann.