Fyrrverandi forsætisráðharrin sleppur ikki av landinum

Fyrrverandi forsætisráðharri í Sri Lanka, Mahinda Rajapaksa, sonur hansara og 15 onnur, hava fingið bann fyri at fara av landinum. 

Tað kunngjørdi ein dómstólur í landinum í dag.

Orsøkin til dómsúrskurðin eru nógvu mótmælini í landinum, sum byrjaðu mánadagin.

Orsøkin til mótmælini er stóra búskaparliga kreppan í landinum, sum hevur vart í fleiri áratíggju.

Hevur lagt frá sær

Forsætisráðharrin, Mahinda Rajapaksa, legði frá sær mánadagin eftir nógvu mótmælini, og myndugleikarnir hava samstundis lýst undantaksstøðu og útgonguforboð. Mótmælisfólkini krevja eisini, at forsetin, sum er bróðir Rajapaksa, leggur frá sær.

Harðir samanbrestir hava verið millum løgreglu og mótmælisfólk.

í gjár vóru 85.000 løgreglufólk send út á gøturnar at verja myndugleikar, og við boðum um at skjóta við skørpum eftir mótmælisfólkunum.

Síðani mánadagin hava níggju fólk ligið eftirá, og ófriðurin hevur elvt til stórar oyðileggingar.