Umboðsmaðurin vil hava ásetingar um næmingaráð í lógina

Bara 22 av 41 skúlum hava næmingaráð, 21 fólkaskúlar og ein frískúli. 

Løgtingsins umboðsmaður hevur kannað, hvussu nógvir fólkaskúlar, frískúlar og serskúli hava næmingaráð.

45 skúlar vóru spurdir, 41 svaraðu. 22 skúlar hava næmingaráð. Næmingaráðini eru 33 í tali.

Bara fimm skúlar hava næmingaráð, har øll floksstig eru við.

Teir flestu av teimum 19 skúlunum, 16 fólkaskúlar, tveir frískúlar og ein serskúli, sum ikki hava næmingaráð, hava færri enn hálvthundrað næmingar.

Skulu hava næmingaráð

Fólkaskúlalógin sigur, at skúlar, sum hava fimta flokk ella eldri floksstig, skulu hava næmingaráð.

11 slíkir fólkaskúlar høvdu ikki næmingaráð sambært kanningini hjá Løgtingsins umboðsmanni.

Yvirskipað heldur Løgtingsins umboðsmaður, at næmingaráðini í nógvum skúlum eru tikin við uppá ráð í viðurskiftum, sum viðvíkja teimum. Tey hava møguleika at ávirka umstøðurnar í skúlunum. 

Umboðsmaðurin mælir til, at ásetingar um at stovna næmingaráð ella um skipaða hoyring av næmingunum verða settar inn í frískúlalógina og serskúlalógina.

Løgtingsins umboðsmaður heitir á landsstýrismannin í skúlamálum um at áseta reglur um næmingaráðsval og skipan og virksemi í næmingaráðum.