Landið og kommunur hava fingið meira í skatti

Fleiri pengar komu í almennu kassarnar fyrstu fimm mánaðirnar í ár enn í fjør.

Landskassin fekk góðar 48 milliónir krónur meira í skatti og kommunurnar góðar 43 milliónir.

Hjá landskassanum er inntøkuvøksturin 6,5 prosent í landsskatti, meðan inntøkurnar frá kommunuskatti eru vaksnar fimm prosent.

Størsti vøksturin í Havn

Størsti vøksturin í krónutali hevur Tórshavnar kommuna, sum hevur fingið 16,2 milliónir meira  í skatti.

Síðani koma Runavíkar kommuna við 3,4 milliónum, Klaksvíkar kommuna við 2,5 milliónum og Eysturkommuna við 2,2 milliónum kr. 

Í prosentum kann Húsavíkar kommuna vísa á størsta vøksturin við 24 prosentum. Síðani koma Viðareiðis kommuna við 14,9 prosentum, Hvalbiar kommuna við 13,8 prosentum og Eiðis kommuna við 13,2 prosentum.

Hjá Fugloyar, Skopunar og Fámjins kommunum minkaðu skattainntøkurnar fyrstu fimm mánaðirnar í ár samanborið við í fjør.