G7-londini herða tiltøkini móti Russlandi

G7-londini herða nú tiltøkini móti russiska vápnaídnaðinum. Tað sigur umsitingin hjá amerikanska forsetanum, Joe Biden.

Vesturheimurin hevur sett strong tiltøk í verk móti russiska vápnaídnaðinum eftir innrásina í Ukraina, men nú skulu tiltøkini herðast uppaftur meira, sigur USA.

- G7-londini fara at tillaga og víðka tiltøkini enn meira fyri at avmarka atgongdina hjá Russlandi til vesturlendska tøkni, sum russiski vápnaídnaðurin kann brúka, siga Hvítu Húsini í Washington.

USA lovar samstundis at raka flutningskervið hjá russisku verjuni meint, og at avmarka møguleikarnar hjá Russlandi at endurnýggja hernaðarútgerð, sum landið hevur mist undir harðrenda krígnum, skrivar NTB.