BBC: Johnson gevst sum forsætisráðharri

Bretski forsætisráðharrin, Boris Johnson, fer at leggja frá sær. Tað skriva fleiri bretskir fjølmiðlar, teirra millum almenna kringvarpið, BBC.

Ein talsmaður fyri embætisfólkini hjá Boris Johnson sigur, at hann fer at halda røðu fyri tjóðini einaferð fyrrapartin.

BBC skrivar, at Boris Johnson alment fer at boða frá seinni í dag, at hann leggur frá sær sum forsætisráðharri og sum formaður fyri Konservativa flokkin. Kortini ætlar Johnson at vera sitandi sum forsætisráðharri til heyst, tá nýggjur formaður fyri Konservativa flokkin skal veljast. 

Tað hendir í kjalarvørrinum á, at 53 ráðharrar og undirráðharrar í bretsku stjórnini seinastu 48 tímarnar hava boðað frá, at teir gevast.

Boris Johnson skal hava sagt ósatt fyri ráðharrum og fjølmiðlum, tá hann hevur sagt seg vera óvitandi um ákærur um kynsligan ágang, sum ein týðandi parlamentslimur hjá konservativa flokkinum skal hava framt. Týskvøldið váttaði Johnson, at hann visti um ákærurnar. Og hetta setti ferð á mongu uppsagnirnar.

Mikukvøldið varð ráðharrin í bústaðarmálum, sum eisini er fyrrverandi løgmálaráðharri, Michael Gove, sendur til hús.

Tað hendi, eftir at hann hevði funnist at Boris Johnson, og biðið hann lagt frá sær. Johnson kvittaði við at geva Gove durafjórðingin.

Bretski forsætisráðharrin hevur annars ikki havt ætlanir um at leggja frá sær, hóast ráðharrarnir hava staðið í bíðirøð at fara úr stjórnini.

Boris Johnson yvirlivdi eitt misálitisuppskot fyri einum mánað síðani eftir atfinningar í sonevnda partygate-málinum.

Tá kom fram, at limir í bretsku stjórnini í fleiri umførum ikki hildu avmarkingarnar, sum vórðu settar í verk undir koronustongslinum.

Dagført kl. 10:33