Ukraina: Russland bumbað týdningarmiklar havnir fyri kornútflutning

Tvær rakettir vórðu skotnar niður og tvær aðrar raktu havnina í býnum, ljóðar í fráboðanini frá ukrainska herinum, sum kom á døgurða okkara tíð.

Uppáhaldið hjá Ukraina kemur dagin eftir, at Russland og Ukraina undirskrivaðu eina avtalu um kornútflutning, skrivar tíðindastovan, Ritzau.

Havnarbýurin, Odesa, er týdningarmikil fyri kornútflutningin hjá Ukraina, og tað kemur tí dátt við hjá landinum, um havnin er rakt.

Semja um útflutning undirskrivað í gjár

Aðalskrivarin í ST, António Guterres, segði í gjár á einum hátíðarhaldi í Turkalandi, at Russland og Ukraina eru samd um eina avtalu, ið skal seta ferð á útflutningin av korni aftur.

Hetta merkir, at tað aftur verður latið upp fyri hveitiútflutningi úr Odesa og tveimum øðrum havnarbýum í Ukraina, Tjernomorsk og Pivdennyj.

Skipaflotin hjá Russlandi hevur síðani innrásina forðað fyri, at korn úr Ukraina kann útflytast í havnarbýum við Svartahavið. Fleiri milliónir tons hava síðani tá ligið á goymslum í havnunum, í vanda fyri at fara fyri skeytið.

Prísurin kavaði í gjár

Tað hevur gjørt ilt verri, gjørt sannlíkindini fyri eini matvørukreppu í heiminum størri og eisini gjørt, at prísurin á matvørum og orku í øllum heiminum er farin upp.

Prísurin á hveiti fór í gjár heilt niður á sama støði, sum undan russisku innrásini í februar, tá ið avtalan um kornútflutning varð kunngjørd í gjár.

Bæði Ukraina og Russland teljast millum størstu hveitiútflutningslond í heiminun. Áðrenn kríggið byrjaði, kom umleið 30 prosent av øllum kornútflutninginum frá teimum báðum londunum.