Novo Nordisk vil brúka 121 mió. kr. í Føroyum

Novo Nordisk grunnurin vil brúka 121 mió. kr. í Føroyum.

Kaj Leo Holm Johannesen, landsstýrismaður, hevur biðið løgtingið um loyvi til taka við hesum pengunum.

Pengarnir skulu brúkast í árunum 2023 til og við 2032 til at fíggja rakstur og løgur í samstarvinum millum Novo Nordisk grunnin og Heilsumálaráðið um átøk í viðgerð, tvørgeiraligt samstarv og gransking í diabetes og endokrinologiskum sjúkum.

Kaj Leo Holm Johannesen

Kaj Leo Holm Johannesen, landsstýrismaður í heilsumálum.

Bóðu um samstarv í 2018

Í 2018 vendi Novo Nordisk grunnurin sær til Heilsumálaráðið og spurdi, um áhugi var fyri samstarvi um diabetesviðgerð í Føroyum. 

Í samráðingum millum partarnar eru endokrinologiskar sjúkur komnar aftrat. 

Endokrinologiskar sjúkur eru millum annað beinbroyskni, ovurfiti, evnaskiftissjúkur, sjúkur í hypofysuni og í hjánýrunum.

Endokrinologi er í stuttum læran um hormon og hormonelt treytaðar sjúkur.

Byggja upp í Landssjúkrahúsið

Steno diabetismiðstøðin í Føroyum skal byggjast uppí Landssjúkrahúsið. 

Eftir tey fyrstu 10 árini verður møguleiki fyri at leingja samstarvið við Novo Nordisk grunnin í fýra ár í senn.

Fyrsta viðgerð verður í tinginum í morgin.

H-bygningurin, Landssjúkrahúsið

Ætlanin er at byggja Steno diabetesmiðstøðina upp í Landssjúkrahúsið.