Bilførarin funnin, ringdi sjálvur

Bilførarin, sum var við í einum ferðsluóhappi í Eysturoyartunlinum seinnapartin fríggjadagin men  ikki steðgaði, hevur boðað politinum frá.

Hann helt ikki, óhappið var so stórt, so tí koyrdi hann víðari. Ætlanin var ikki at rýma, hevur hann sagt frá.

Óhappið hendi, tá ein bilførari var á veg av Rókini yvir á Strendur.

Komin oman móti rundkoyringini í tunlinum, setti bilførarin ferðina niður, men tað varnaðist bilførarin aftanfyri ikki og rendi á bilin frammanfyri.

Bilarnir hildu báðir fram at koyra út úr tunlinum strandarmegin, men tá fremri bilurin steðgaði, tí bilførarin ætlaði at tosa við føraran í aftara bilinum, fór tann bilurin bara víðari.

Førarin í ákoyrda bilinum visti ikki nummarið, og tí var bilførarin eftirlýstur.

Hann ringdi so sjálvur til politiið.