Sandoyartunnilin: Landið fær brúk fyri 150 mió. kr. afturat

Landskassin fær brúk fyri 150 milliónum afturat í ár, um løgtingið samtykkir at játta 150 mió. kr. til Sandoyartunnilin nú í 2013.

Samgongan hevur sett av 385 mió. kr. til Sandoyartunnil frá 2014 til og við 2024.

Men samgongan umhugsar at gera Sandoyartunnilin skjótari enn tað og brúka 150 milliónir í ár, uttan at taka av teimum 385 í játtanarkarminum árini 2014 til 2024.

Jørgen svarar Kristinu

Landsbankin er ikki nevndur í svarinum hjá Jørgeni Niclasen, landsstýrismanni, hóast Kristina Háfoss, løgtingskvinna, spyr beinleiðis um pengarnar, sum vóru í Landsbankanum, tá hann læt aftur 1.apríl.

Og Kaj Leo Holm Johannesen, løgmaður, hevur sagt, at tær 150 milliónirnar, sum skulu til Sandoyartunnilin, eru pengarnir, sum vóru í Landsbankanum. Tær milliónirnar skuldu annars brúkast til at styrkja gjaldføri landskassans.

Kristina Háfoss spyr, um landsstýrið ætlar at læna 150 milliónir ella, um gjaldføri landskassans skal minka 150 milliónir.

Ymiskur fíggjartørvur

Jørgen Niclasen svarar, at ymiskt er frá ári til ár, hvør fíggjartørvurin hjá landinum er. Tað veldst um, hvussu nógv skuld verður afturgoldin.

Løgtingskvinnan fekk ikki nakað beinleiðis svar uppá, hvussu landskassin útvegar 150 mió. kr., um løgtingið samtykkir at brúka 150 milliónir afturat til Sandoyartunnil í ár.

Leiðreglan hevur verið, at landið altíð hevur 15 prosent av bruttotjóðarúrtøkuni standandi á bók. Tað svarar til okkurt um tvær milliardir krónur. Eingin ætlan er um at broyta hetta, svarar landsstýrismaðurin í fíggjarmálum.