Westminster forðaði fyri fyrstu ferð einari skotskari lóg

Bretska stjórnin í Westminster hevur á fyrsta sinni forðað fyri einari lóg, sum skotska parlamenti hevur samtykt.

Skotska parlamentið samtykti herfyri eina lóg, sum skuldi gera tað lættari hjá fólki at fáa løgfrøðiligt kynsskifti.

Samstundis lækkaði aldurin fyri nær ein kann fáa løgfrøðiligt kynsskifti úr 18 niður í 16 ár.

Men bretska stjórnin forðaði í gjárkvøldið lógini við tí grundgeving, at hon fer at ávirka javnstøðulógir í restini av Bretlandi.

Nicola Sturgeon

Skotski forsætisráðharrin, Nicola Sturgeon, segði í gjárkvøldið, at forðingin úr Westminster var eitt beinleiðis álop á skotska parlamentið.

Hon segði eisini, at skotska stjórnin stendur saman um lógina, og hon ávaraði um, at um hendan lógin bleiv steðgað í Westminster, fer tað helst at vera tann fyrsta av mongum.

Fyri rættin

Tað verður væntað at skotska stjórnin leggur málið fyri rættin, men bíðar í fyrstu atløgu eftir fleiri frágreiðingum frá bretska ráðharranum fyri Skotland, skrivar BBC.

Bretska stjórnin hevur tó skotið upp, at lógin verður tillagað, men skotsku ráðharrarnir hava gjørt greitt, at teir ætla ikki at broyta samtyktu lógina.

Sambært BBC, so kann Bretska stjórnin forða fyri lógum samtyktar í Skotlandi, um hon metir, at lógin kann fáa negativa ávirkan á aðrar lógir, sum eru galdandi í Bretlandi.