Vilja hava danir at gera íløgur í Kina

Kinesiski uttanríkisráðharrin, Wang Yi, segði eftir fund við danska uttanríkisráðharran, Lars Løkke Rasmussen, at danskar vinnufyritøkur eiga at gera fleiri íløgur í Kina.

Wang hitti danska uttanríkisráðharran í Keypmannahavn í gjár. 

Eftir fundin segði Wang, at hann vónar, at Danmark fer at hava tað, sum hann lýsir sum ein konstruktivan leiklut, at stuðla eini sunnari og støðugari menning í viðurskiftunum millum ES og Kina.

Wang segði eisini, at Kina er til reiðar at menna samstarvið innan vísindi og menning, grøna skipaferðslu, heilsu og ferðavinnu. 

Tað stendur í fráboðan, sum tíðindastovan Reuters hevur fingið frá kinesiskum myndugleikum.

Løkke segði, sambært fráboðanini, at handilssambandið og grøna samstarvið mennast rætta vegin.

Wang Yi og Fríðrikur kongur

Løkke hevur onga fráboðan sent út eftir fundin, skrivar danska tíðindastovan Ritzau. 

Wang Yi hevur eisini hitt Fríðrik kong. 

Undan fundinum segði Løkke, at stuðulin frá Kina til Russland í krígnum móti Ukraina og handilsjavnvágin hjá ES við Kina vóru á skránni. 

ES keypir í løtuni nógv meira úr Kina enn Kina ger úr ES. Handilsjavnin millum Danmark og Kina er tó nøkulunda javnur.

Wang byrjaði sína norðurlendsku vitjan í Keypmannahavn í gjár. 

Wang Yi vitjar eisini í Svøríki, Finnlandi og Noregi.