Nú eru 15 kommunur á Vanganum

Nú eru 15 kommunur at finna á talgilda Vanganum, og níggju av teimum eru komnar á Vangan hesa vikuna.

Í teimum 15 kommununum búgva 43.300 fólk.

Tilsamans eru 29 kommunur í Føroyum, og seks aðrar kommunur hava samstarvsavtalu við Vangan og koma á Vangan seinni í ár. 

Kommunurnar veita nógvar tænastur, og tørvurin hjá teimum er oftast hin sami.

Ein av stóru fyrimununum við felags menning er, at nógv kann endurnýtast, og kommunurnar fáa sostatt stóra nyttu úr samstarvinum bæði fíggjarliga og tøkniliga, skrivar Vangin.

Møguleiki er millum annað at søkja um byggiloyvi, mentanarstuðul og flyting hjá kommunum um landið.

Málið hjá Talgildu Føroyar er, at føroyingar skulu kunna avgreiða flestu av sínum viðurskiftum við tað almenna og kommunur talgilt á Vanganum.