Pápi spyr: Sparka fótbóltsspælarar í skeivum skóm?

Eftir at dóttirin, Martha, sleit krossbandið undir fótbóltsvenjing í mars í fjør, hevur Samson Nesá spurt, um føroyskir fótbóltsspælarar sparka í skeivum slagi av gaggum.

Føroysku ítróttarhandlarnir bjóða og selja mest gaggur við sonevndum FG-knubbum (firm ground), sum eru gjørdar til at spæla á grasi. AG-gaggur (artificial gras), sum er gjørdar til graslíki, eru munandi verri at fáa fatur á hjá føroyska kundanum. Afturat hesum bjóða handlarnir eisini einstøk onnur sløg sum FG/AG, FG/MG og MG (multi ground), sum sambært onkrum vegleiðingum kunnu brúkast bæði á grasi og graslíki.

Samson Nesá heldur tað vera undranarvert, at føroysku handlarnir hava lutfalsliga so stórt úrval av FG-gaggum, tá tað mestsum bara verður spælt á graslíki í Føroyum.

 - So fer mann inn á síðurnar hjá hesum ymsu, sum selja gaggurnar. Teir hava nakað, sum eitur AG-gaggur til graslíki, og FG-gaggur til turran grasvøll. Tá eg fari runt í handlarnar í Føroyum at hyggja at hesum, vísir tað seg, at kanska 80-90 prosent av gaggunum vit selja í Føroyum eru FG, sigur Samson Nesá.

 - Vit hava bara ein grasvøll í Føroyum, og hann er í Hvalba. Restin er graslíki. So vit selja gaggur til grasvøll og næstan ikki til graslíki, og tað ljóðar heilt løgið í mínari verð.

Samson Nesá sigur seg vilja varpa ljós á, at tað finnast fleiri sløg av gaggum, og at tað hevur týdning at fótbóltsspælarar og foreldur eru varug við hetta.