Flestu børnini fødd uttan fyri hjúnalag

Meira enn helvtin av børnunum, sum verða fødd í Føroyum, eru fødd uttan fyri hjúnalag. Tað vísa hagtøl hjá Landslæknanum, sum millum annað skrásetur viðurskifti viðvíkjandi føðingum í Føroyum.

Í fjør vóru 57,9 prosent av nýføddu børnunum fødd uttan fyri hjúnalag. Hagtølini hjá landslæknanum ganga aftur til 2000, og ongantíð hetta tíðarskeiðið hevur talið á nýføðingum, sum ikki hava gift foreldur, verið so stórt.

Í 2000 vóru bara 41,1 prosent av børnunum fødd uttan fyri hjúnalag. Árini eftir lá talið nøkulunda um 50 prosent, men seinastu trý árini eru tað alt fleiri, sum koma í verðina uttan fyri hjúnalag. Í 2011 var talið 57,5 prosent, og í 2010 var tað 46,7 prosent.