USA: Meiri skattur frá ríkum at bjarga heilsuskipan

Amerikanski forsetin, Joe Biden, leggur í morgin fram fíggjarlógina fyri í ár. 

Hann fer m.a. at krevja meira skatt frá ríkum borgum fyri at bjarga heilsuskipanini, Medicare.

Forsetin hækkar skattin úr 3,8 upp í 5 prosent hjá teimum, sum forvinna meira enn 400.000 dollarar um árið, íroknað løn og vinningsbýti.

"Fer ongantíð at siggja dagsins ljós"

Sambært forsetanum fer uppskotið at gera skipanina støðugari fyri miðalstættina og milliónir av teimum, sum eru eldri enn 65 ár.

Formaðurin fyri minnilutanum í Senatinum, republikanarin Mitch McConnell, var skjótur at viðmerkja uppskotið.

Hann segði, at fíggjarlógaruppskotið hjá Biden fer "ongantíð at síggja dagsins ljós".

Meira enn 65 milliónir fólk dúva upp á Medicare.