Oljudálking á Kollafirði og eystaru vág í Havn

Sløkkiliðið í Tórshavnar kommunu hevur havt úr at gera við at taka olju upp úr sjónum seinastu dagarnar.

Í gjár fóru einir hundrað litrar úr einum fiskiskipi á sjógv í Kollafirði. Talan var um hydraulikkolju.

Fyrradagin fór olja á sjógv, tá eitt farmaskip, sum lá við bryggju á eystaru vág, bunkraði. Har fóru nakrir hundrað litrar á sjógv.

Sektaruppskot

Bæði málini verða nú kannað, og síðani sendir politiið málið til Umhvørvisstovuna, sum umsitir oljudálking á sjónum. Umhvørvisstovan kemur síðani við einum sektaruppskoti til eigararnar av skipunum. Verður sektin góðtikin og goldin, verður ikki gjørt meira við málið.

Bøturnar fyri oljudálking verða roknaðar eftir eini vegleiðandi talvu hjá Umhvørvisstovuni.  

Er til dømis talan um 500 litrar, sum fara á sjógv, er bótin 150.000 krónur.