Xi Jinping fer undir triðja forsetaskeiðið

Xi Jinping er afturvaldur til forseta í Kina fyri triðju ferð. Tað var tjóðartingið í Kina, sum afturvaldi 69 ára gamal leiðaran.

Tað siga almennir tíðindamiðlar í Kina, skrivar Ritzau.

Einki annað valevni var at velja ímillum, tá ið tey næstan 3.000 fólkini í tjóðartinginum einmælt atkvøddu fyri Xi Jinping.

Í oktober var Xi Jinping eisini afturvaldur til aðalskrivara í komunistiska flokkinum í Kina.

Tað er óvanligt at sita í trý valskeið sum forseti í Kina. Undanmenninir hjá Xi Jinping fóru báðir frá, eftir at hava verið forsetar í 10 ár.