Tveir bankar í USA farnir av knóranum

Tveir bankar í USA eru farnir av knóranum seinastu dagarnar, og ein triði hevur stórar fíggjarligar trupulleikar. 

Fríggjadagin boðaði Silicon Valley Bank frá, at hann ikki kláraði at standa ímóti longur, og seinni sama dag komu somu boð frá bankanum Signature.

NTB skrivar, at hetta órógvar partabrævamarknaðirnar kring heimin.

First Republic Bank

Kursfallið hjá amerikonskum bankum er stórt í hesum døgum, m.a. hjá First Republic Bank. (Mynd: Ritzau Scanpix)

Áðrenn partabrævamarknaðirnir lótu upp í USA í dag, var kursurin hjá bankanum First Republic Bank fallin 60 prosent á tí sonevnda "undanmarknaðinum". Hetta hendi, sjálvt um bankin hevði fingið fíggjarliga hjálp frá bæði amerikanska miðbankanum og JP Morgan, og bankin hongur nú í einum klønum tráði.

Her um okkara leiðir ávirkar støðan hjá amerikonsku bankunum eisini. Kursurin hjá teimum flestu norðurlandsku bankunum, sum eru skrásettir á marknaðunum, er fallin í dag.

Silicon Valley Bank, sum er tann 16. størsti í USA, er latin upp aftur, men undir herdum almennum eftirliti. Eisini er bretski parturin av bankanum seldur.