Leita nú eftir miðnámsskúlanæmingum at manna herin

Russiski Wagner-leiguherurin sleppur eftir øllum at døma ikki longur at útvega sær fangar í russiskum fongslum til herin. 

Nú leitar privati herurin í staðin eftir herfólki í venjingarmiðstøðum og miðnámsskúlum. 

Tað skrivar bretska verjumálaráðið í dagføring síni í dag.

Sambært bretum, hava Wagner-hermenn í duldarbúna havt "vegleiðing um yrkisleið" á miðnámsskúlum í Moskva.

Teir skulu hava býtt út faldara, sum hevur yvirskriftina "Søkt verður eftir ungum krígsmonnum", har biðið verður um telefon-nummar og aðrar upplýsingar frá næmingunum, sum hava áhuga.

Yevgeni Prighozhin, Wagner-herurin

Yevgeni Prighozhin er leiðari í Wagner-herinum. (Mynd: Reuters/Ritzau Scanpix)

Hevur ikki atgongd til fongsul

Orsøkin til nýggja átakið er, sambært bretska verjumálaráðnum, at leiðarin fyri Wagner-herin, Yevgeni Prighozhin, orsakað av ósemju við russiskar myndugleikar, ikki longur hevur atgongd til russisk fongsul.

Bretska verjumálaráðið metir, at umleið helvtin av fangunum, sum Wagner-herurin hevur útvegað sær, hevur latið lív í krígnum, og at nýggju átøkini neyvan eru nóg mikið til at seta fólk fyri falnu hermenninar.

- Yevgeni Prighozhin verður helst noyddur at taka seg aftur á fleiri hermótum, um forboðið fyri at brúka fangar stendur við, stendur í frágreiðingini hjá bretsku fregnartænastuni.