Tórsfest verður aftur í ár

Fólk kunnu aftur gleða seg til, at tað verður eitt stórt konserttiltak vikuskiftið áðrenn ólavsøkuna í ár. 

Tórsfest var ikki á skránni í fjør, men kemur sterkt aftur í ár, lova fyriskipararnir. 

Gamla ólavsøkukonsertin

Tórsfest er gamla Ólavsøkukonsertin, sum hevur eina langa søgu, ið strekkir heilt aftur til 1981. 

Síðan 2012 hevur Tórshavnar ítróttarráð fyriskipað Ólavsøkukonsertina, og í 2014 broytti konsertin navn til Tórsfest, og flutti samstundis niðan á Vaglið í Havn.

Onkuntíð hava tað bara verið føroysk tónleikanøvn, ið hava framført á ólavsøkukonsertini, men í nýggjari tíð hevur tað verið blandað føroysk og útlendsk nøvn.