Zelenskyj bjóðar Kina at tosa um friðarloysn

Volodymyr Zelenskyj, forseti í Ukraina, bjóðar nú Kina til samrøðu.

Russiski forsetin, Vladimir Putin, segði í gjár, at friðarætlanirnar hjá Kina kunnu verða grundarlagið undir eini loysn í Ukraina, tá ið vesturheimurin og Kyiev eru til reiðar.

Og hesum svarar Zelenskyj nú, og bjóðar Kina vælkomnum at tosa um støðuna.

Hann sigur, at Ukraina hevur boðið Kina at gerast felagi, soleiðis at uppskriftin upp á eina loysn kann setast í verk, sum forsetin málber seg.

- Vit hava sent innbjóðingina og bíða eftir svari, segði Zelenskyj á tíðindafundi í gjár.

Fumio Kishida og Volodymyr Zelenskyj

Japanski forsætisráðharrin, Fumio Kishida, hevur júst verið á vitjan hjá ukrainska forsetanum, Zelenskyj. (Mynd: Ritzau Scanpix)

Lán úr IMF

Ukraina er fyrsta landið í krígsstøðu, sum fær lán úr Altjóða gjaldoyragrunninum, IMF.

Ukraina fær 15,6 milliardir dollarar í láni. Tað eru næstan 108 milliardir krónur í okkara peningi.

Lánið, sum IMF við hesum fyri fyrstu ferð veitir einum krígsraktum landi, verður eftir ætlan góðkent um nakrar vikur.

Hetta verður eisini ein av størstu fíggjarligu hjálparpakkunum til Ukraina, síðani russisku innrásina.

Tað er stutt síðani, at Altjóða gjaldoyragrunnurin broytti reglugerðina, soleiðis, at tað verður loyvt at veita londum lán, hóast búskaparligu útlini eru óvanliga ótrygg.

Tað ber til at broyta reglugerðina, tí fíggjarlig trygd verður veitt frá millum øðrum ES og G7-londunum.