Kommunurnar vilja ikki vita av lønarlyfti

Kommunala arbeiðsgevarafelagið heldur einki um lønarlyftið hjá landsstýrinum.

Lønin eigur at hækka við samráðingarborðið, halda kommunurnar.

Formaðurin í felagnum, Per Martin Gregersen, borgarstjóri í Eysturkommunu, er samdur við formannin í Kommunufelagnum, Torbjørn Jacobsen, sum í gjár segði við Útvarpið, at kommunurnar vilja ikki vita av lønarlyfti.

Per Martin Gregersen sigur, at lønarlyftið fer at kosta kommununum okkurt um 30 mió. kr.

Men teir pengarnar skulu kommunurnar fáa aftur frá landinum, sigur landsstýrið.

Og tað eru ikki pengarnir, men prinsippið, sum kommununum  ikki dámar.

Skal lønin hækka, skal tað gerast við sáttmálasamráðingum, sigur Per Martin Gregersen.

Landsstýrið ætlar, at námsfrøðingar, námsfrøðihjálparar, hjálparfólk, heilsurøktarar og heilsuhjálparar við og uttan útbúgving fáa lønarlyft 1.januar næsta ár.