- Vit liva, sum um hepnið er við okkum í allar ævir

IAEA hevur fleiri ferðir sagt seg stúra fyri trygdini hjá størsta kjarnorkuverkinum í Evropa. 

Russiskar herdeildir tóku valdið á kjarnorkuverkinum har suðuri í Ukraina í mars í fjør.

- Vit kunnu ikki vænta, at hepnið er við okkum í allar ævir, tá ið vit tosa um kjarnorkutrygdina í Zaporizjza-verkinum, sigur Grossi í fráboðan.

- Taka vit ikki tøk fyri at verja orkuverkið, endar tað fyrr ella seinni galið - við møguliga álvarsligum avleiðingum fyri heilsuna hjá fólki og fyri umhvørvið, leggur hann aftrat.

Tvær landminur brustu 8. og 12. apríl uttan fyri girðingina, sum er runt um orkuverkið, stendur í fráboðanini. 

Tað er ógreitt, hví tær sprongdust.

Grossi hitti leiðandi umboð fyri Russland í Kaliningrad í síðstu viku fyri at tosa um eina ætlan fyri trygdina hjá verkinum. 

Undan fundinum hevði hann hitt ukrainska forsetan, Volodymyr Zelenski.

Stjórin fyri IAEA rópti í gjár eisini varskó um, at verkið bert hevur eina orkulinju, sum virkar, og "ógvuliga stórur vandi" er fyri trygdini.

Eykalinjan, sum fekk skaða 1. mars, er framvegis ikki umvæld, sambært IAEA.