Peru: Politikari dømdur 12 ára fongsul fyri at hava dripið journalist

Í Peru er fyrrverandi innanríkisráðharrin og offiserurin í fregnartænastuni hjá herinum, Daniel Uresti, dømdur 12 ára fongsul fyri at hava dripið ein journalist í 1988.

Uresti, sum er konservativur politikari, hevur eisini verið forsetavalevni og er nógv brúktur sum viðmerkjari. 

Hann var offiserur í fregnartænastuni í 1988, tá ið journalisturin Hugo Bustios var dripin.

Bustios arbeiddi fyri at avdúka brot á mannarættindi undir borgarakrígnum í Peru. 

Fyrst var hildið, at hernaðarligi kommunistiski bólkurin 'Lýsandi gøta' hevði framt illgerðina, men seinni kom fram, at herurin drap Bustios fyri at forða fyri, at valdsgerðir móti fólkinum í Huanta-landspartinum vóru umrøddar.

Ákæruvaldið kravdi Uresti dømdan 25 ára fongsul, men fer ikki kæra 12 ára fongsulsrevsingina. 

Uresti umhugsar at kæra dómin.

Í minsta lagi 69.000 fólk vóru dripin ella hvurvu í borgarakrígnum, sum byrjaði fyri meira enn 40 árum síðani og vardi í 20 ár við samanbrestum millum uppreistrarfólk og trygdardeildir, sigur sannleika- og semingsnevndin í Peru.