50.000 trø í Dalinum langa

Tórshavnar kommunu hevur gjørt sáttmála við Urtagarðstænastuna, sum í kapping við tríggjar aðrar veitarar vann uppgávuna at gera ætlaða náttúruøkið í Dalinum langa.

Økið skal skipast við gróðurseting, so tað í støðum verður tætt, fjálgt og viðarlundakent, men aðrastaðni opnari, so dalurin og vátlendið í stóran mun verða varðveitt.

Tilsamans verða væntandi eini 50.000 trø plantað í økinum, og kommunan hevur samskift við vinnugrannar um at vera við í plantingini í økinum upp at vinnustykkjunum eystan fyri Dalin langa.

Næsta leygardag eru allir borgarar í økinum bodnir at vera við til ein arbeiðsdag, har øll í felag gróðurseta og planta náttúruøkið.

Eftir kaffi og morgunbreyð klokkan 11 fara øll at gróðurseta, og heitt verður á fólk um at hava sín egna spaka við.