Russiskur leiguhermaður í Noregi vil sleppa heimaftur

Russiska sendistovan í Oslo váttar, at maðurin, sum sigur seg hava verið leiðara fyri eini herdeild í privata russiska Wagner-herinum, hevur vent sær til sendistovuna og sagt, at hann vil sleppa heimaftur.

Andrej Medvedev segði seg vera russiskan leiguhermann í Wagner-herinum í fleiri mánaðir í fjør, áðrenn hann í januar rýmdi til Noregs og bað um friðskjól har.

Nú hevur hann lagt út fleiri videoupptøkur, og tær hava vakt ans. 

Har sigur hann, at hann vil sleppa heimaftur til Russland, og at hann hevur tosað við russisku sendistovuna.

Og tað váttar sendistovan.

- Vit vátta, at Medvedev hevur verið í konsul-deildini á sendistovuni. Spurningurin um heimsending til Russlands skal loysast sambært russiskari lóg, sigur Timur Tsjekanov á russisku sendistovuni í Oslo, við NTB.

- At Medvedev vil sleppa  heimaftur til Russlands er, tí hann sjálvur vil tað, sigur Tsjekanov.