Hava merkt síl í Norðragøtu

Starvsfólk frá Fiskaaling hava í vikuni verið í ánni í Norðragøtu og merkt síl, og eisini hava fólk frá Sílaveiðifelagnum verið við.

Hetta er liður í Sjósílaverkætlanini hjá Fiskaaling, ið skal fáa grundleggjandi vitan um sjósíl til vega.

Tá sílini eru tikin upp við glúpi, verða tey doyvd og síðani vigað og mátað.

Eisini verða nakrar roðslur frá hvørjum síli goymdar til nærri gransking seinni.

Áðrenn sílini verða slept aftur, verða tey merkt við PIT-merkjum, so fylgjast kann við teimum, har antennur eru settar upp til endamálið.

Kirstin Eliasen, leiðari á Fiskaheilsudeildini á Fiskaaling, er verkætlanarleiðari á Sjósílaverkætlanini, sum hevur verið í gongd síðani 2019.