Ríkisfundur í Nuuk í dag

Árligi ríkisfundurin hjá forsætisráðharranum, landsstýrisformanninum og løgmanni er í Nuuk í dag.

Í gjár hevði samstarvsráðið fund. Samstarvsráðið viðger uttanríkismál, trygdarmál og verjupolitisk mál í ríkinum.

Umframt løgmann vóru Høgni Hoydal og Ruth Vang, landsstýrisfólk, á tí fundinum.

Einki nýtt um arktiska sendifólkið

Eftir tann fundin segði Mette Frederiksen, forsætisráðharri, at einki nýtt er um arktiska sendifólkið hjá Danmark.

Grønlendingar eru óðir, tí Danmark aftur nú hevur sett ein dana í starvið.

Grønland heldur, at ein grønlendingur skal hava hetta starvið.  

Mette Frederiksen segði, at stjórnin og landsstýrið halda fram at viðgera spurningin við tí endamáli at finna bestu loysnina skjótt.

Ríkisfelagsskapurin fer at broytast

Mette Frederiksen segði annars, at hon væntar ikki, at ríkisfelagsskapurin verður óbroyttur í allar ævir.

Um 50 ár verður hann ein annar enn nú, segði Mette Frederiksen, skrivar KNR.

Múte B. Egede, landsstýrisformaður, segði, at uttanríkispolitisku heimildirnar, sum Grønland og Føroyar hava í dag, ikki eru nóg góðar.

Samráðast má um tær av nýggjum, segði hann.

Fyri fyrstu ferð hittast uttanríkispolitiska nevndin í fólkatinginum og uttanlandsnevndirnar í Føroyum og í Grønlandi í sambandi við ríkisfund.

Nevndirnar hava fund í dag og í morgin.