Aki-Matilda ætlar at gerast forkvinna í Siumut

Hørð kapping verður um, hvør skal standa á odda fyri grønlendska javnaðarflokkinum, Siumut, eftir landsfundin hjá flokkinum, sum verður síðst í juli.

Fyrrverandi formaðurin, Kim Kielsen, boðaði í seinasta mánaði frá, at hann fer at bjóða verandi formanninum, Erik Jensen, av, og sunnukvøldið boðaði grønlendski fólkatingslimurin Aki-Mathilda Høegh-Dam á Facebook frá, at eisini hon ætlar at stilla upp.

Aki-Matilda Høegh-Dam sigur við KNR, at hon ætlar at gera politikkin hjá Siumut sjónligari, og at fólkið eisini skal hava størri ávirkan á politikkin.

Um Aki-Matilda Høegh-Dam verður vald til forkvinnu í Siumut, er hon til reiðar at siga fólkatingssessin frá sær, krevur flokkurin tað. Ger hon tað, er næsti maður á listanum presturin Markus E. Olsen.

Hann sigur við KNR, at hann er til reiðar at fara í Fólkatingið, um boð verða eftir sær.