Eingin noyðist at tosa danskt í rættinum

Føroya rættur hevur gjørt avtalu við fólk, sum kann umseta í rættinum, um brúk er fyri tí.

Føroya rættur hevur eisini avtalu við ákæruvaldið um, at tað boðar frá, um brúk er fyri tolki.

Peter Hummelgaard, løgmálaráðharri, hevur svarað spurningi frá Onnu Falkenberg, fólkatingskvinnu, sum spurdi, hvussu ofta føroyskt, danskt, enskt ella onnur mál vera brúkt í Føroya rætti.

Føroya rættur upplýsir, at eingi tøl eru um hetta.

Føroyskt ella danskt

Anna Falkenberg spurdi eisini, um føroyingar eru noyddir at tosa danskt í Føroya rætti.

Ráðharrin svarar við upplýsingum frá Føroya rætti, at eingin føroyingur er noyddur at tosa danskt í rættinum.

Tá tað er neyðugt, vera fólk fingin til at umseta.

Og tá setudómarar ella ákærar eru boðsendir úr Danmark, vera tey biðin, sum skilja føroyskt.

Lukkast tað ikki, er tolkur á rættarfundinum, sigur Føroya rættur.