Rópa varskó um jarðhitaboringar

Nakrar kommunur eru longu givnar at geva loyvi til at bora eftir jarðhita.

Og vandi er fyri, at fleiri fara at gera tað.

Tað var niðurstøðan á stýrisfundi í Kommunufelagnum í gjár.
 
Felagið sigur, at ábyrgdin fyri dustinum, sum kemur frá boringunum, og dálking má staðfestast, so somu krøv vera til allar jarðhitaboringar. 

Summar kommunur hava spurt landsmyndugleikarnar, men sum skilst er ógreitt, hvat er í dustinum.

Oyðileggur kloakkir

Eisini hevur dustið lyndi til at leggja seg sum betong í kloakkskipanirnar. 

Kommunurnar kunnu tí ikki bara lata standa til, tí mangt bendir eisini á, at dustið leggur seg varandi í áir og vøtn. 

Eitt samt stýri í Kommunufelagnum heitir á landsstýrið og viðkomandi myndugleikar um at fáa skil á hesum øki.

Kommunufelagið vil, at kommunurnar kunnu seta felags krøv um jarðhitaboringar. 

Men tær hava brúk fyri, at landið er við í hesum arbeiði.

Stýrið heitir tí á landsstýriskvinnuna í umhvørvismálum um alt fyri eitt at skipa so fyri, at gongd verður sett á arbeiðið at fáa skil á hesum økinum. 

Luturin hjá kommununum skal ikki liggja eftir, sigur Kommunufelagið.