Farmaflogfarið fer at eita Eysturoy

Flogfarið, sum FarCargo hevur keypt úr USA at flúgva laks fyri Bakkafrost úr Føroyum á amerikanska marknaðin, fer at eita Eysturoy.

Tað skrivar check-in.dk

Flogfarið, sum er av slagnum 757-200, er 22 ára gamalt. Tað hevur flogið við ferðafólki, men nú verður tað riggað til farmaflutning. 

Flogfarið er keypt úr USA, men tað verður umbygt í Kina. Hong Kong Aircraft Engineering Company Limited stendur fyri arbeiðnum. 

Birgir Nielsen, kommunuval 2020, uppteljing

Birgir Nielsen er stjóri í FarCargo. (Bjarni Árting Rubeksen)

Skrásett í Svøríki

Bakkafrost hevur stovnað FarCargo, men flogfarið verður skrásett í Svøríki. Samstarv er fingið í lag við svenska felagið, West Atlantic, sum eisini hevur rakstrarloyvið um hendi. 

Birgir Nielsen, stjóri i FarCargo, sigur í samrøðu við check-in.dk, at FarCargo væntar at fáa umbygda flogfarið seinast í august.

Og ætlanin er at fara undir farmaflúgvingina seinast í september. 

Ikki neyðug skjalprógv

Upprunaliga ætlaði FarCargo at keypa eitt flogfar av sama slag frá 1992, sum m.a. hevði flogið fyri russiska felagið Aviaster-TU Airlines. 

Men evropeisku loftferðslumyndugleikarnir góðkendu ikki skjølini, tí fyrrverandi eigararnir kundu eftir øllum at døma ikki útvega neyðug skjalprógv.

Ætlanin var tí slept, og FarCargo fór tí at leita eftir einum øðrum flogfari. 

Flogfarið, sum nú er keypt, hevur burturav flogið í USA, og tí verður lættari at avgreiða pappírsarbeiðið, skrivar check-in.dk

Hoyr samrøðu, sum Frants Jensen gjørdi við Birgir Nielsen, stjóra í FarCargo: