Handverksmeistarar skulu løggildast

Landsstýrismaðurin í vinnumálum fer at gera lógaruppskot um løggildingarskipan til handverksmeistarar. 

Samstundis er ætlanin, at Barna-og útbúgvingarmálaráðið leggur til rættis eina meistaraútbúgving til handverksmeistarar.

Tað sigur Høgni Hoydal, landsstýrismaður, í svari til Kim Durhuus, løgtingsmann.

Hann spurdi, um ein lóg er á veg, sum krevur, at byggifyritøkur, sum arbeiða fyri privat fólk, eisini skulu seta fíggjarliga trygd.

Kim Durhuus

Kim Durhuus, løgtingsmaður.

Samsvara ikki við fakligu krøvini

Høgni Hoydal sigur, at krøvini til teirra, sum bjóða uppá og standa fyri byggiverkætlanum í Føroyum, eru ikki í samsvari við herdu fakligu krøvini um bygging, sum ásett eru í byggilógini og bygningskunngerðini. 

Men spurningurin, sum Kim Durhuus setir, er ikki viðgjørdur, sigur landsstýrismaðurin.

- Eg eri kortini sannførdur um, at spurningurin eigur at vera kannaður nærri, sigur Høgni Hoydal.

Í dag kunnu partar, sum gera avtalu um eina byggiverkætlan, avtala eina fíggjarliga trygd. 

Um byggifyritøkur og privatfólk gagnnýta møguleikan at avtala fíggjarliga trygd, tá sethús skulu byggjast, er heldur óvist, sigur landsstýrismaðurin.