Føroyskur fótbóltur í nýggjum hami

Føroyskur fótbóltur skal hava meistaraspæl og upp- og niðurflytingarspæl.

Nógv bendir á, at kappingarleisturin fyri føroysku landskappingina í fótbólti verður kollveltur, skrivar in.fo.

Sambært keldum, sum in.fo hevur tosað við, er meiriluti millum føroysku fótbóltsfeløgini fyri at broyta leistin frá klassiska leistinum, har øll spæla ímóti øllum, og liðið við mest stigum vinnur føroyameistaraheitið.

Nýggja uppskotið gongur út upp á, at tá kappingin er hálvspæld verða liðini býtt í tveir bólkar. Seks tey ovastu fara í meistarabólk og spæla um FM, meðan fýra tey niðastu fara í bólk saman við tveimum teimumf remstu í 1. deild og spæla um upp- og niðurflyting.

Tað fremsta liðið í niðara bólkinum skal so spæla um eitt evropapláss ímóti tí niðasta í ovara bólkinum, sum hevur vunnið sær rætt til evropeiskan fótbólt, skrivar in.fo.