Trolari rendi á ísfjall

Ikki gongur alt ov væl hjá trolaranum Polar Nataarnaq hjá Polar Seafood.

Leygardagin sigldi trolarin á eitt ísfjall sunnan fyri Grønland.

Eingin fólkaskaði var. 13 mans eru við trolaranum.

Polar Nataarnaq er komin til Føroya at vera umvældur og liggur nú á Skála.

Hassj umborð
Polar Nataarnaq var á veg til Grønlands, eftir at hava verið á beding í Danmark.

Meðan hann var har, vóru funnin fýra kilo av hassji umborð.

Á veg heim til Grønlands var trolarin á Havnini. Tá vóru funnin fimm kilo aftrat av hassji umborð.

Fyrst í januar í ár var samanstoytur millum Polar Nataarnaq og trolaran Akamalik við Maniitsoq.