Hava funnið 18 lík í skógareldi í Grikkalandi

Grikskir myndugleikar hava funnið líkini av 18 fólkum í leivdunum av skógareldi. Talan er helst um migrantar, sum hava latið lív í eldinum.

Skógareldar hava verið í hesum økinum har norðuri í Grikkalandi seinastu fýra samdøgrini. 4.000 hektarar eru farnir upp í royk.

Tað skrivar Reuters sambært danska kringvarpinum.

Skógarøkið í Evros-landspartin er ein nógv brúkt leið hjá migrantum, í royndini at sleppa úr Turkalandi til okkurt evropeiskt land.

Í býnum Alexandroupolis, sum er nærindis, vóru fleiri flutt av sjúkrahúsinum í ein bát, fyri at sleppa undan eldinum, sum enn breiðir seg.

Ógvisligi roykurin er rokkin heilt til høvuðsstaðin, Athen, sum er sunnaliga í Grikkalandi.

Myndugleikar ávara um sera stóra vandan fyri fleiri skógareldum av nógva hitanum.