Lewandowski: Onkuntíð er neyðugt við toli

Hann er stjørnan á pólska liðnum, og tað kemur ikki av ongum.

Robert Lewandowski var avgerandi spælarin fyri Pólland í sigrinum á Føroyum í Varsjava, men tey bæði málini hjá Barcelona-framherjanum máttu bíða leingi.

 - Onkuntíð er nyeðugt við toli. Viðhvørt mást tú bíða til 70. minutt, men tá alt kemur til alt, hava vit trý stig, og tóku fyrsta fetið, segði Robert Lewandowski eftir dystin.

Framherjin legði Pólland framum við brotssparki í 72. minutti, og góðar 10 minuttir seinnni økti hann við framúr skoti upp um Mathias Lamhauge og yvir í handara málhorn.

Pólska stjørnan ásannaði kortini, at talan hevði verið um truplan dyst ímóti føroyska liðnum, sum leingi vardi væl frammanfyri egnum máli.

 - Vit vistu frammanundan, at vit fóru at fáa ein torføran dyst, og at fyrsta málið kundi broyta dystin.

 - Vit royndu at skora tíðliga, men vóru ikki nóg neyvir við síðstu sendingunum og skotunum, segði Robert Lewandowski.