Smyril Line keypt eitt farmaskip aftrat

Smyril Line hevur keypt RoRo-farmaskipið Seagard frá finska reiðarínum Bore Ltd.

Skipið verður latið Smyril Line í Hirtshals í fyrstu viku í januar 2024.

Tað fær tá navnið Glyvursnes.

Skipið er bygt í Týsklandi í 1999. Tað er 153,5 metrar langt og 20,6 metrar breitt.

Glyvursnes verður sett í regluliga sigling millum Tórshavn, Þórlakshöfn og Hirtshals í staðin fyri Mistral, sum Smyril Line hevur leigað seinastu árini.

Tá Glyvursnes kemur, eigur Smyril Line øll seks skipini, sum tað hevur í flotanum.