Semingsstovnurin tosar aftur við partarnar

Terje Sigurðsson, semingsmaður, hevur borið Lønardeildini hjá Fíggjarmálaráðnum boðini, sum Óluva í Gong bar honum fyrrapartin.

Forkvinnan í sjúkrarøktarfrøðingafelanum hevði fund við semingsstovnin fyrrapartin.

Í tiðindunum á middegi segði Óluva í Gong, at felagið vil hava nøkur viðurskifti við í semingsuppskotið, um sjúkrarøktarfrøðingarnir skulu góðtaka tað.

Terje Sigurðsson, semingsmaður sigur, at hann tosar við partarnar.

Bíðar eftir svari

- Eg havi havt fund við Lønardeildina, og bíði nú eftir svari frá teimum, segði hann í stuttari viðmerking fyri løtu síðani.

Terje Sigurðsson sigur, at hann tekur ta tíð, sum er neyðug, og veit ikki at siga, nær nýtt er at frætta.

Jan Mortensen, stjóri á Lønardeildini hevur onga viðmerking.

Nevndin hjá felagnum Føroyskir SJúkrarøktarfrøðingar fór á fund klokkan 9 í morgun at umrøða støðuna, eftir at felagið hósdagin vrakaði eitt semingsuppskot, sum Semingsstovnurin legði fyri tey og Lønardeildina hjá Fíggjarmálaráðnum.