Sjey ára fongsul fyri ætlanir um at smugla rúsevni til Føroya

Ein 25 ára gamal maður hevur í rættinum í Hjørring fingið sjey ára treytaleysa fongsulsrevsing fyri at ætla at smugla sløk sjey kilo av amfetamini, 100 gramm av kokaini og fimm kilo av hassji til Føroya, skrivar nordjyske.dk.

Maðurin var tikin, tá hann bíðaði eftir at koyra um borð á Norrønu í Hirtshals.

Rúsevnini vóru funnin í bili hansara, har sum eykahjólið eigur at vera.

Hetta var 6.mai. 

Norrøna

Ætlanin var at smugla rúsevnini til Føroya við Norrønu. (Savnsmynd: Bjarni Árting Rubeksen)

Játtaði seg sekan

Maðurin játtaði seg sekan alt fyri eitt og vísti tollarunum, hvar rúsevnini vóru. Men hann segði, at hann visti ikki, at hann eisini skuldi smugla sterk rúsevni til Føroya. 

Hann visti ikki, at amfetamin og kokain eisini vóru í bilinum, hevur hann sagt. Hann átti ikki bilin sjálvur, men fekk hann tveir dagar, áðrenn hann skuldi til Føroya.

Hann kannaði ikki, hvørji rúsevni vóru í bilinum. Hann helt, at har var bara hassj.  

Tók ikki við dóminum

Maðurin segði, at hann hevði fingið lovað, at 200.000 kr., sum hann hevði í spæliskuld, blivu strikaðar, um hann átók sær smuglingina.

25 ára gamli maðurin, sum er dani, tók ikki við dóminum, men vil slepppa at umhugsa møguleikan at royna málið í landsrættinum, skrivar nordjyske.dk.