Trý ára fongsul fyri at snýta føroyskar handilsmenn

Ein maður í Danmark er dømdur í rættinum í Helsingør fyri at snýta føroyskar handilsmenn fyri níggju milliónir krónur.

Tað skrivar Frihedsbrevet.

Maðurin fekk trý ára fongsul.

Men hann noktar seg sekan, og hevur longu appellerað dómin.

Lumpaði handilsmenninar

BT, sum hevur lisið dómin, skrivar, at maðurin er dømdur fyri at lumpa føroyskar handlilsmenn.

Hann er eisini dømdur fyri at falsa undirskriftina hjá einum føroyskum handilsmanni.

Dømdi maðurin fekk 2,3 milliónir krónur í egnna lumma burtur úr teimum níggju milliónum, sum hann lumpaði vinnulívsmenninar at seta í eina byggiverkætlan í Roskilde.

Eingin ivi

Rætturin helt, at frágreiðingarnar hjá føroysku handilsmonnunum vóru eftirfarandi.

Eingin ivi var um, at teir vóru snýttir, heldur rætturin.

Maðurin er eisini dømdur fyri at falsa undirskiftina hjá tí eina føroyska handilsmanninum, sum hann kallaði Trump.