Nik Kershaw á Tórsfest

Sólin fer eftir øllum at døma ikki at seta yvir Tórsfest næsta summar, tí enski Nik Kershaw kemur at framføra síni stóru hitt frá áttatiárunum á Tórsfesti í Havnargøtum 26. juli. 

Nik Kershaw bleiv kendur longu í 80árunum, tá hann hittaði stort við sangum sum "I Won’t Let The Sun Go Down On Me", "Wouldn’t it be good" og "The Riddle".

Sangir, ið lógu ovast á hittlistum kring heimin í fleiri vikur, men sum enn verða nógv spældir í útvarpsrásum í dag. 

Eftir at hann sjálvur hevði framført kring allan heim og útgivið hitt omaná hitt, so valdi Nik Kershaw at at leggja meira orku í at framleiða og skriva sangir fyri aðrar tónleikarar.

Nik Kershaw hevur millum annað samstarvað við so kend nøvn sum Elton John, Siu, Gary Barlow og Bonnie Tyler.  

Men tað, ið nógv kanska ikki vita er, at Nik Kershaw og okkara egni Teitur Lassen hava eisini skrivað ein sang saman, sum er at finna á plátuni The Singer hjá Teiti. 

Talan er um sangin "Stop Wasting My Time".