Venjarin: Vónsvikin av fyrra hálvleiki

 - Vit enda ov langt afturi á vøllinum, vit eru ov passivir og loyva teimum ígjøgnum í síðunum.

Tað segði venjarin hjá føroyska manslandsliðnum í fótbólti, Håkan Ericson, eftir 2-0 tapið fyri Norra í venjingardystinum í Oslo.

Jørgen Strand Larsen og stórtalentið, Oscar Bobb, úr Manchester City, skoraðu málini í ávíkavist 3. og 23. minutti, og yvirhøvur gekst illa at steðga ágangandi og vælspælandi norðmonnunum fyri steðgin.

Eftir steðgin spældu Føroyar betri. Norra slapp ikki eins lætt afturum føroysku verjuna, meðan spælið við bólti betnaði nakað, tá millum annað Jóannes Bjartalíð var komin á vøllin. 

 - Eg fegnist um, at vit reisa okkum eftir steðgin. Vit geva teimum ein betri dyst og eru munandi betur skipaðir eftir dystin. Tað skulu spælararnir eiga rós fyri, segði Håkan Ericson, sum kortini viðgekk, at norðmenn kanska áttu at havt vunnið við fleiri málum enn teimum tveimum.

Mánakvøldið er síðstu EM-undankappingardysturin í ár á skránni, tá Albania tekur ímóti Føroyum.