Hjálpa migrantum til norska markið

- Tað er púra greitt, at átøk eru í gongd fyri at hjálpa migrantum til markið.

Tað sigur norski uttanríkisráðharrin, Espen Barth Eide.

- Vit hava sæð tað sama í Baltalondum. Og vit fylgja neyvt við tí, sum hendir í Finnlandi, sigur hann.

Jens Stoltenberg, aðalskrivari í Nato, fordømdi mánadagin Russland fyri at brúka migrantar sum vápn. 

Hann segði, at seinastu vikurnar hevur Russland skipað fyri, at migrantar kunnu koma um markið til Finnlands.

Finnland hevur stongt markið móti Russlandi.

Noreg er til reiðar at stongja markið við Storskog, um tað sama hendir við markið móti Russlandi.

- Vit kunnu stongja markið av trygdarorsøkum, segði Barth Eide.

Uttanríkisráðharrin heldur ikki, at tað er brot á rættin hjá fólki at biðja um friðskjól í landinum, sum tú ert í.

- Vit fyrireika hetta og halda, at tað er í lagi. Tú hevur rætt til at biðja um friðskjól, um tú ert í landinum. Men tað er ikki almennur rættur at koma inn í landið, sigur norski uttanríkisráðharrin Espen Barth Eide.