Ísrael hevur lopið á sunnara part av Gasa

Ísrael hevur lopið á har suðuri í Gasa, og sambært ísraelska verjumálaráðnum verður álopið skipað á sama hátt sum álopið har norðuri í Gasageiranum. 

- Vit hava stríðst hart og væl har norðuri,  og tað gera vit eisini nú har suðuri í Gasa, segði Herzi Halevi, aðalstjóri í verjumálaráðnum, í gjár.

Talsmaðurin fyri uttanríkisráðið, Daniel Hagari, segði í gjárkvøldið, at álopið har suðuri er byrjað beint norðan fyri Khan Younis, og ætlanin er at víðka tað til hvørt einasta øki í Gasa, har Hamas heldur til.

Hann gjørdi eisini greitt, at herdeildirnar leypa á við somu megi, sum tær gjørdu har norðuri.

Í flogseðlum, sum vóru sleptir yvir Khan Younis í gjár, var heitt á øll, sum eru í fimm stórum økjum í og kring býin, um at fara úr økinum.

Men samstundis sum bumbuálopini halda fram, ávarar ST um, at trygdarøkini, sum eru gjørd, ikki hava pláss fyri fleiri fólkum.

Stjórin í ST-mannarættindum, Volker Türk, sigur, at hundraðtúsundatals palestinar eru tvingaðir til at stúva seg saman á alsamt minni øki, samstundis sum trygg øki ikki eru til í Gasa longur.