William í uppskoti at fáa Nobelvirðisløn í 1973

Í hálva øld hevur savnið við uppskotum at fáa Nobelvirðislønina í bókmentum verið hildið loyniligt. 

Úr fundarpappírunum frá hesum ári, sum í dag eru løgd fram í tíðindaskrivi frá Svenska Akademinum, síggjast nøvnini á øllum teimum skrivandi fólkunum, sum hava verið skotin upp til Nobelvirðislønina hetta árið, hvør hevur skotið upp, og hvønn uppskotsstillarin umboðar. 

Hundrað nøvn eru á listanum, og nú er greitt, at William Heinesen var í uppskoti at fáa Nobelvirðislønina í bókmentum í 1973, skrivar Birgir Kruse á netbloggi sínum. 

Tað var Arthur Arnholtz, professari í norðurlendskari filologi á Lærda háskúlanum í Keypmannahavn, sum saman við øðrum skjeyt upp, at føroyski rithøvundurin skuldi hava Nobelvirðislønina í 1973.  

Hetta árið fór Nobelvirðislønin í bókmentum til Patrick White úr Avstralia.