Fara nú undir hotellbygging í Klaksvík

Verkætlanin við nýggjum hotelli ella gistingarhúsi í Klaksvík er nú komin so langt, at ætlanin er at fara undir at byggja um miðjan januar. 

Tað sigur Jan Petersen, sum stjóri í felagnum Christiani í Grótinum, ið hevur tikið stig til og fer at eiga gistingarhúsið. 

Jan Petersen

Jan Petersen er stjóri í felagnum Christiani í Grótinum. 

Nýggja gistingarhúsið verður 4-stjørnað og fer at hava 81 rúmlig kømur, eina matstovu og fundarhøli til umleið 300 fólk. 

Tað eru Ósbjørn Jacobsen Arkitektar, sum hava teknað bygningin. Fyritøkan Kanjon fer at standa fyri byggingini. 

Kostnaðurin fer at liggja um 150 mió. krónur, og eftir ætlan fer gistingarhúsið at vera klárt at taka í nýtslu í desember næsta ár.