Ein føroyingur aftrat til IK Sävehof

Ungi strikuspælarin Ísak Vedelsbøl skal spæla við IK Sävehof næsta kappingarár.

Landsliðsspælarin verður sostatt triði føroyingurin, sum roynir seg í svenska stórbýarfelagnum, har Óli Mittún spælir í løtuni.

Størsta føroyska hondbóltsnavnið, Elias Ellefsen á Skipagøtu, var eisini í felagnum í tvey kappingarár, áðrenn týska stórfelagið THW Kiel sendi boð eftir honum í summar.

 - Eg eri ein 19 ára gamal strikuspælari, sum gleðir seg at fara í gulsvørtu Sävehof-blusuna. Eg havi hoyrt nógv gott um felagið og gleði meg at mennast í IK Sävehof, sigur Ísak Vedelsbøl sambært facebook-vanganum hjá svenska felagnum.

Ítróttastjórin í IK Sävehof, Jonathan Stenbäcken, er væl nøgdur við at fáa triðja føroyingin til felagið.

 - Vit vóna, at Ísak mennist munandi komandi árini. Vit hava fleiri góðar ungar strikuspælarar, sum koma at venja, spæla og kempa fyri framgongd saman við Ísaki, sigur ítróttastjórin.