Bretland lovar Ukraina 22 milliardir í stuðli

Bretski forsætisráðharrin, Rishi Sunak, lovar Ukraina milliardastuðul næsta árið,  ella 2,5 milliardir pund. 

Rishi Sunak er á vitjan í Ukraina í dag. 

Í høvuðsstaðnum Kyiv skal hann m.a. skriva undir søguliga avtalu um trygdarsamstarv millum londini bæði, stendur í fráboðan frá bretskum myndugleikum.

- Eg eri her í dag við boðunum: Bretland ivast ikki. Vit standa saman við Ukraina í myrkastu tíð teirra og í ljósari tíðum, sum koma, sigur Sunak í fráboðanini.

2,5 milliardir pund í hernaðarstuðli svara til slakar 21,7 milliardir krónur, og peningurin verður latin í komandi fíggjarári.

Hetta eru 200 milliónir pund meira enn seinastu tvey árini, ella góðar 1,7 milliardir krónur meira.